Disco Frisco í Amman

Eins og sjá má hefur áhöfnin á FI 1440 verið fremur upptekin. Of upptekin til að blogga meira að segja.  Þó við séum nú komin til gömlu góðu Evrópu, skal samt farið örlítið aftur í tímann og ævintýri okkar í Amman tíunduð. Við komuna til Jórdaníu vorum við í fínasta formi enda aðeins lagt að baki þrjá flugtíma.  Við erum öllu vanari tveimur fimm tíma leggjum og tuttugu tíma vöktum.  Í fanta formi tékkuðum við inn á Radison Sas og héldum okkur komin hálfa leiðina heim.   Hótelið stóðst væntingar okkar um Bo Bedre designið, reyndar 1987 útgáfuna, en við horfðum fram hjá rósóttu gardínunum og í gegnum þær og nutum sama útsýnis og Karl XVI Gustaf konungur svía og Richard Gere þegar þeir gistu þetta hótel.

Við skutluðumst í bæinn og keyptum ægifagra búninga og gjafir handa farþegunum okkar.  

Um kvöldið vorum við boðin í hátíðarkvöldverð með farþegum og fararstjórum í fornum rústum ofan við borgina.  Umhverfið var allt með ævintýralegum blæ.  Kertaljós og fallega skreytt borð undir berum himni.  Við dreifðum okkur meðal farþeganna og fengum að kynnast þeim á annan hátt.  Ekki er að orðlengja það að kvöldið endaði með trylltum dansi og fóru áhafnarmeðlimir þar á kostum og héldu gersamlega uppi stuðinu.  Við fengum allra ólíklegustu gamalmenni út á "gólfið " í brjálað diskó. 

Næsta dag hélt Capt. Baldvin í langferð með flugfreyjunum fimm.  Stefnan var tekin á hina fornu borg Petru.  Eftir þriggja tíma akstur yfir Hellisheiðina -auðn og tóm- komum við á þennan fornfræga stað og gengum um steinborgina í tvo tíma. Stórkostleg upplifun.  Þegar heim var komið fóru sumir í dekur á hótel spa-inu áður er haldið var í koju.  

Í morgun flugum við til Ítalíu og mikið var gaman að taka á móti farþegunum eftir dansiballið góða. Flugfreyjurnar í glæsilegum arabískum kjólum, flugþjónn og kokkur klæddir eins og arabískir sjeikar.  Myndirnar tala sínu máli þegar þær koma.   Reyndar er áhöfnin aðeins farin að láta á sjá, nokkrir höfðu bólfélaga sem bitu þá og aðrir voru komnir með "bug " í mallakútinn.  

Núna sitjum við öll saman á fyndnu gömlu hóteli og njótum lífsins.  Hugsum okkur gott til glóðarinnar að snæða ekta ítalskan mat.  Okkur finnst við reyndar vera komin nokkuð nálægt heimahögunum, enda aðeins eins tíma mismunur á klukkunni.  Soldið mikill munur frá Ástralíu...! Sendum bestu kveðjur heim í snjóinn ( 20 gráður hér).